Teithiau Cerdded Cylchol

Mae taith gerdded gylchol yn ffordd ardderchog o ddarganfod arfordir Cymru a gweld golygfeydd llawn ysbrydoliaeth ac mae’n rhoi gwedd newydd ar y wlad i chi, heb i chi orfod troi’n ôl neu ddefnyddio cludiant cyhoeddus. Yn aml, mae’r llwybrau’n mynd heibio trefi, pentrefi a mannau o ddiddordeb ar yr arfordir na fyddech efallai’n eu gweld wrth gerdded y prif lwybr.

Mewn partneriaeth â’n swyddogion lleol mae Paddy Dillon, yr awdur teithio profiadol, wedi datblygu casgliad newydd o deithiau cerdded cylchol sy’n defnyddio hawliau tramwy cyhoeddus cyfredol, llwybrau a ffyrdd mewn rhannau dethol o Gymru. Fel arfer nid ydynt wedi cael eu harwyddo ond bydd y cyfarwyddiadau manwl a geir yma a’r ffeiliau GPX yn caniatáu ichi ganfod y ffordd.

Mae detholiad hefyd ar gael ar wefan yr Arolwg Ordnans. Bydd angen i chi greu cyfrif OS, am ddim, i weld y teithiau cerdded hyn. Ar ôl gwneud hyn, byddwch yn gallu gweld y llwybrau ar fap rhyngweithiol, proffil y llwybr a byddwch yn gallu allforio ffeil GPX i'ch dyfais GPS eich hun ar gyfer pob taith gerdded.

Mae’r teithlennau hefyd yn rhoi manylion cludiant cyhoeddus, mannau o ddiddordeb a lletygarwch. Gallwch hefyd gynllunio eich siwrnai gan ddefnyddio Traveline Cymru, gwasanaeth gwybodaeth cludiant cyhoeddus yng Nghymru.

Dyma rai llwybrau cerdded cylchol eraill oddi ar Lwybr Arfordir Cymru: 

• Mae Teithiau cerdded cylchol Parc Cenedlaethol Penfro yn gasgliad sylweddol ac amrywiol o deithiau cerdded cylchol sy’n addas i bob gallu, o’r heriol i’r hamddenol.
• Beth am ddarganfod teithiau cerdded cylchol Ynys Môn ac archwilio’r arfordir eiconig.
• Cafodd teithiau cerdded cylchol Ceredigion eu datblygu i ddathlu 15 mlynedd ers i’r rhan hon gael ei hagor yn swyddogol.
• Mae gan ran Gwynedd o Lwybr Arfordir Cymru gyfres wedi’i harwyddo o deithiau cerdded cylchol, sy’n gyfle i werthfawrogi natur, treftadaeth a diwylliant yr ardal.
• Mae teithiau cerdded cylchol Bro Morgannwg Llwybrau Fro yn cynnig profiad arbennig i breswylwyr ac ymwelwyr o’r arfordir treftadaeth hwn.
• Mae’r Ymddiriedolaeth Genedlaethol yn gofalu am leoliadau arfordirol eiconig ac wedi datblygu cyfres o deithiau cerdded cylchol arfordirol hardd ar eu tir.